Um teyggjuna

Í august 2007 valdi Fiskivinnustovan at taka stig til at menna eina nýggja KT-skipan til umsiting av fiskiloyvum og rættindum annars. Um sama mundi hevði Føroya Skipaskráseting, sum tá lá undir Fiskimálaráðnum, tikið stig til at kravfesta eina nýggja KT-skipan til umsiting av Føroya Skipaskrá og FAS.

Leiðslan í Fiskimálaráðnum dugdi at síggja, at nú fleiri stovnar í Ráðnum tørvaðu nýggja skipan, var neyðugt at umhugsa at fáa gagnnýtt pengar og tilfeingi annars so væl, at Ráðið fekk mest møguligt KT burturúr játtanini hjá Ráðnum. Tí var skjótt avgjørt, at arbeiðast skuldi fram móti at gera eina felags KT-umsitingarskipan, sum so við og við skuldi kunna mennast til at umfata alla saks- og málsviðgerð í Ráðnum, og soleiðis mennast til at umfata allar stovnar undir Ráðnum.

Tá avgerðin, um at menna eina felags skipan fyri allar stovnarnar í Ráðnum, var endaliga staðfest, var eisini skjótt semja um, at skipanin skuldi hava eitt óheft navn, soleiðis at ongin ávísur stovnur føldi størri ognarrætt til skipanina enn ein annar. Navnakapping varð tí útskrivað innanhýsis í Ráðnum, og tá samanum kom, fekk skipanin navnið TEYGGJAN.

Høvuðsorsøkin til heildarskipanina, Teyggjan, er grundað á, at stovnarnir undir Fiskimálaráðnum nógvu seinastu árini als ikki hava dagført sínar telduskipanir, og í fleiri førum hava ongar skipanir verið til umsitingarligu uppgávurnar hjá Ráðnum. Metingin hjá Ráðnum er, at menningin av eini heildarskipan tí er tann loysnin, sum fyri minst møguligar pengar gevur tað besta úrslitið.

Tískil er málið við Teyggjuni, at brúkarin so við og við fær eina skipan, sum gevur upplýsingar frá nógvum ymiskum stovnum.

Fyribils ber til at fáa hesar upplýsingar:

  • Kunning um skip og bátar, sum eru skrásett/ir undir føroyskum flaggi
  • Avmarkaða kunning um útlendsk skip, ið fiska undir Føroyum
  • Kunning um fiskiloyvi hjá skipum og bátum, og hvussu hesi fiskiloyvi eru býtt millum bólkar, øki og bátar/skip
  • Kunning um ognarviðurskifti hjá skipum og bátum

Fyrsta tíðin er ein royndartíð, sum gevur okkum møguleika at rætta feilir og feilskrásetingar.

Tit kunnu seta tykkum í samband við Føroya Skipaskráseting á fas@skraseting.fo og Fiskivinnustovuna á fiskiloyvi@fisk.fo
Spurningar ella feilir kunnu fráboðast á teyggjan@teyggjan.fo
Teyggjan